संखुवासभा जिल्ला अस्पतालमा भेन्टिलेटर जडान

इटहरी- खाँदबारीस्थित संखुवासभा जिल्ला अस्पतालमा पहिलोपटक भेन्टिलेटर जडान गरिएकाे छ। योसँगै संखुवासभा अस्पताल भेन्टिलेटर सुविधा भएकाे प्रदेश १ को पहिलो पहाडी जिल्ला बनेको छ।

अरुण तेस्रो जलविद्युत परियोजनाको उत्पादक एसजेभीएन अरुण थर्ड पावर विकास कम्पनीले मंगलबार दुइवटा भेन्टिलेटर सहयोग गरेको अस्पताल व्यवस्थापन समितिका अध्यक्ष सुमन शाक्यले बताए।

शाक्यका अनुसार कम्पनीले ३ वटा अत्याधुनिक आईसीयू शय्यासमेत सहगोग गरेको छ। उनले नेपाल समयसँग टेलिफोनमा भने, ‘कम्पनीले ८७ लाख रुपैयाँ बढीका पीपीई, अक्सिजन कनसन्ट्रेटर, पल्स अक्सिमिटरदेखि आधुनिक आईसीयू शय्या र भेन्टिलेटर सहयोग गरेको छ।'

अस्पतालमा यसअघि भेन्टिलेटर र आधुनिक आईसीयू थिएनन्। शाक्यका अनुसार कम्पनीले १ करोड ५ लाखको उपकरण सहयोग गर्ने सम्झौता गरेको छ। बाँकी उपकरण क्रमशः उपलब्ध हुने शाक्यले बताए। एसजेभीएन निर्माणाधीन ९०० मेगावाटको जलविद्युत उत्पादक कम्पनी हो।

५० शय्याको अस्पतालमा ७ शय्या आइसोलेसनका लागि छुट्याइएको समिति अध्यक्ष शाक्यले बताए। उनले भने, ‘आइसोलेसन वार्डमा कोभिड–१९ का शंस्कास्पद बिरामीको उपचारमा आवश्यक सबै प्राविधिक सहयोग आएपछि सजिलो भएको छ।’

उत्पादक कम्पनीका सीईओ अरुन दिमनले विज्ञप्ति जारी गर्दै मार्च दोस्रो साताबाट नेपाल र भारतमा परियोजनाका कामदार आवागमन बन्द गरिएको बताए। मार्च २३ बाट अरुण आयोजनाका सबै काम स्थगन गरिएको छ।