आगलागीमा ६० लाखको धनमाल नष्ट

काठमाडौं- देशका विभिन्न ठाउँमा आगलागी हुँदा ६० लाख बराबरको धनमाल जलेर नष्ट भएको छ।

सुनसरीको कोसी गाउँपालिका–३ का भुनेश्वर सरदारलगायत ५ जनाको घरमा सोमबार साँझ आगलागी हुँदा १८ लाख ३२ हजार रुपैयाँ बराबरको धनमाल जलेर नष्ट भएको छ।

यस्तै उदयपुरको उदयपुरगढी गाउँपालिका–५ फाटका होमबहादुर सुवेदीको गोठमा आगलागी हुँदा २ लाख ५० हजार रुपैयाँ बराबरको धनमाल जलेर नष्ट भएको प्रहरीले जनाएको छ।

सर्लाहीको गोडैता नगरपालिका–११ का मुनाई मण्डल र कसिन्द्र मण्डलको घर र गोठमा आगलागी हुँदा करिब ७ लाख ३ हजार रुपैयाँ बराबरको धनमाल जलेर नष्ट भएको छ।

सर्लाहीकै लालबन्दी नगरपालिका–६ का पदम बहादुर कटवालको पार्किङ गरी राखेको ना.६ ख ७१६९ नम्बरको बसमा आगलागी हुँदा बस जलेर करिब २५ लाख रुपैयाँ बराबरको धनमाल नष्ट भएको छ।

सप्तरीको बोदेबर्साईन नगरपालिका–६ मलहनियाका शिवु यादवको कच्ची घर र गोठमा आगलागी हुँदा नगद ५० हजार रुपैयाँसहित ५ लाख २५ हजार रुपैयाँ बराबरको धनमाल नष्ट भएको प्रहरीले जनाएको छ।