काठमाडौं- बागलुङमा कोरोना भाइरस संक्रमित १९ वर्षीया युवतीलाई पोखराबाट उनको घरसम्म पुर्याउने स्कर्पियो गाडीका चालकको पहिचान खुलेको छ।
खरा महानगरपालिका–२५ स्थायी घर भई हाल माछापुच्छ्रे गाउँपालिका–३ बस्ने चालक घरमै सेल्फ–क्वारेन्टाइनमा राखिएको प्रहरीले जनाएको छ। उनलाई स्थानीय जनप्रतिनिधिको निगरानीमा राखिएको र स्वास्थ्य अवस्था सामान्य रहेको बुझिएको छ।
युवतीलाई गत शनिबार कोरोना संक्रमण भएको पुष्टि भएपछि पोखराबाट बागलुङ घरसम्म लैजाने गाडी चालकको खोजी थालिएको थियो। चालक आइतबार जनप्रतिनिधिको सम्पर्कमा आएका थिए।
आइतबार नै परीक्षणका लागि पोखरा लगिएका चालकमा कोरोनासँग मिल्दोजुल्दो कुनै लक्षण नदेखिएकाले सामान्य तापक्रम जाँच गरेर घरमा पठाइएको थियो।
स्थानीयले भने उनकोे स्वाब परीक्षण गर्न माग गरेका छन्। गत चैत ४ गतेपछिको समय ती चालकको अन्य व्यक्तिसँग सम्पर्क भएकाले स्थानीय अहिले त्रसित भएको पोखरा २५ का वडाध्यक्ष सूर्यप्रसाद लम्सालले जानकारी दिए।
चालकले भने पोखरा स्वास्थ्य विज्ञान प्रतिष्ठानका चिकित्सकले लक्षण नदेखिएसम्म स्वाब परीक्षण नगर्ने भनी घर पठाएको बताए।