चन्द्रागिरि नगरपालिकाले अलपत्र विद्यार्थी र मजदुरलाई घर पुर्याइदिने

काठमाडौं– काठमाडौंको चन्द्रागिरि नगरपालिकाले विद्यार्थी तथा मजदुरलाई घर नजिकको राजमार्गसम्म पु-याउने व्यवस्था मिलाउने भएको छ ।

नगरपालिकाले ‘लकडाउन’का कारण अलपत्र परेका विद्यार्थी तथा मजदुरलाई घर जाने व्यवस्था मिलाउन लागेको हो।

नगर प्रवक्ता हरिभक्त महर्जनले नगरपालिकाभित्र कोठामा बसेर दैनिक ज्यालादारी गर्ने मजदुर तथा विद्यार्थीलाई घर नजिकको राजमार्गसम्म पु-याउन गाडीको व्यवस्था गर्ने निर्णय गरिएको जानकारी दिए।

नगरपालिकाले घर जान मन गरेका विद्यार्थी तथा मजदुरलाई वडामा नामथर, हाल बसोबास गरेको ठेगाना, कार्यरत रहेको संस्था वा कार्यालयको नाम, बाहिर जान लागेको गन्तव्यस्थलको ठेगाना र सम्पर्क नम्बर टिपाउन अनुरोधसमेत गरेको छ । रासस