कोरोनाबारे जानकारी दिन वेबसाइट र एप्स

काठमाडौं– सरकारले कोरोना भाइरस (कोभिड–१९)सम्बन्धी जानकारी दिन वेबसाइट र एप्स सञ्चालन गरेको छ। स्वास्थ्यमन्त्री भानुभक्त ढकालले आइतबार वेबसाइट र एप्सको शुभारम्भ गरेका हुन्।

मन्त्रालयले covid19.mohp.gov.np नामक वेबसाइट र ‘हाम्रो स्वास्थ्य’ मोबाइल एप सञ्चालनमा ल्याएको छ।

शुभारम्भ कार्यक्रममा मन्त्री ढकालले वेबसाइटमार्फत हव अस्पताल, कोभिड–१९ लक्षित अस्पताल र क्वारेन्टाइनको लोकेसन र अवस्थाको जानकारी दिइने बताए। वेबसाइट र एप्समार्फत कोरोनाको लक्षणबारे जानकारी लिन सकिने उनले बताए।

यसअघि सरकारले कोरोनाबारे जानकारी दिन भाइबर कम्युनिटी सञ्चालन गरेको थियो। मन्त्रालयका अनुसार covid19.mohp.gov.np नामक वेबसाइटबाट एप्स डाउनलोड गर्न सकिनेछ।