जनकपुरधाम– प्रहरीले मास्क र पञ्जा कालोबजारी गर्ने एकजनालाई जनकपुरबाट पक्राउ गरेको छ । बजार अनुगमनको क्रममा बढी मूल्य लिएर मास्क र पञ्जा बिक्री गरिरहेको पाइएपछि कालोबजारी गर्ने एक व्यवसायीलाई प्रहरीलाई पक्राउ गरेको हो ।
पक्राउ पर्नेमा जनकपुरधाम–४ स्थित ३६ वर्षीय राजेशकुमार झा रहेको प्रहरीले जनाएको छ । प्रादेशिक अस्पताल जनकपुरस्थित बजरंग जेनरल स्टोरमा मास्क प्रतिथान ७५० रुपैयाँ र पञ्जा प्रति पोका पाँच सय रुपैयाँमा बिक्री गरिरहेको अवस्थामा झालाई पक्राउ गरिएको जिल्ला प्रहरी कार्यालय धनुषाका डीएसपी रामेश्वर कार्कीले जानकारी दिए ।
झालाई जिल्ला प्रहरी कार्यालयको हिरासतमा राखेर थप अनुसन्धान भइरहेको उनले जनाए ।
लकडाउन भएयता जनकपुरबाट कालोबजारी गर्ने १७ जनालाई प्रहरीले पक्राउ गरेको छ । लकडाउनको मौका छोपेर खाद्यान्न, तरकारी, खाना पकाउने ग्यासलगायतका अत्यावश्यक सामग्री कालोबजारी गर्ने १७ जनालाई प्रहरीले जनकपुरबाट पक्राउ गरेको हो ।