काठमाडौं– बेल्जियममा घरमा पालिएको बिरालोमा पनि कोरोना भाइरस (कोभिड–१९) संक्रमण देखिएको छ। समाचार संस्था एएफपीले जनाएअनुसार संक्रमण मालिकबाट बिरालोमा सरेको हो।
यसअघि हङकङमा पनि दुईवटा कुकुरमा कोभिड–१९ संक्रमण देखिएको थियो। संक्रमित व्यक्तिले पालेका १७ कुकुर ८ वटा बिरालोको परीक्षण गर्दा दुईटा कुकुर संक्रमित फेला परेका थिए।
हङकङका कुकुरमा संक्रमणको कुनै लक्षण नदेखिएको भए पनि बेल्जियमको बिरालोमा स्वाश्प्रस्वास र खाना अपचको समस्या देखिएको छ।
डा. इमानुयल आन्द्रेका अनुसार संक्रमित व्यक्तिको प्रत्यक्ष सम्पर्कले घरपालुवा जनावर पनि जोखिममा परेका छन्। मानिसबाट घरपालुवा जनावरमा सरेको भए पनि अहिलेसम्म जनावरबाट जनावर र जनावरबाट मानिसमा कोभिड–१९ सरेको पुष्टि भएको छैन्।
आन्द्रेले जनावरलाई पनि पौष्टिक खाना खुवाउन र उनीहरूको सम्पर्कमा पुगेपछि हात धुन सुझाव दिएका छन्।