जनकपुरधाम- कोरोना संक्रमण रोकथाम गर्न सरकारले लागु गरेको ‘लकडाउन’ मा दैनिक मजदुरी गरेर जीवनयापन गर्नेहरु समस्या परेपछि सहयोगी हात जुटेको छ।
गरिब तथा विपन्न परिवारलाई सहयोग गर्न जनकपुरका विभिन्न संघसंस्था अघि सरेका छन्। यसै क्रममा जनकपुरधाम उपमहानगरपालिका–११ का विपन्न परिवारलाई जनकपुर उद्योग वाणिज्य संघका वरिष्ठ उपाध्यक्ष जितेन्द्रप्रसाद साहले खाद्यान्न सहयोग गरेका छन्।
साहको पहलमा जनकपुरस्थित गणेश इँटा उद्योगले गरिब तथा विपन्न परिवारलाई खाद्यान्न सहयोग गरेको हो। ‘लकडाउन’ का कारण दैनिक ज्यालादारी गरेर जीवनयापन गरिरहेका विपन्न समुदाय समस्यामा परेपछि खाद्यान्न सहयोग गरिएको साहले बताए।
उनीहरुलाई चामल, दाल, आलु, प्याज सहयोग गरिएको गणेश इँटा उद्योगका सञ्चालक जिवछ साहले बताए । ‘लकडाउन’ पछि कामधन्धा ठप्प हुँदा उनीहरु समस्यामा परेको थाहा पाएपछि केही भएपनि सहयोग गरिएको उनले बताए ।