नेपालमा कोरोना भाइरसको संक्रमण पुष्टि भएका धनगढीका एक युवकले आफूलाई कोरोना पुष्टि भएको रिपोर्ट मिडियाबाट जानकारी पाएको बताएका छन् ।
ती युवकमा कोरोना पुष्टि भएको शुक्रबार बेलुका स्वास्थ्य मन्त्रालयले जनाएको थियो । मन्त्रालयले सार्वजनिक गरेपछिमात्र मिडियाबाट आफूलाई संक्रमण भएको थाहा पाएको उनले बताएका छन्।
धनगढीका पत्रकार नवराज धानुकसँग आज (शनिबार) बिहान फेसबुक लाइभमा टेलिफोनमार्फत् कुरा गरेका उनले अस्पताल र चिकित्सकले आफूलाई वास्ता नगरेको गुनासो गरेका छन्। उनले आफूलाई गाह्रो नभएको पनि बताएका छन्।
संक्रमित युवा र अर्का एक जना साथी २० मार्च (७ चैत)का दिन बिहान साढे ४ बजेको फ्लाइटमा दुबईबाट इमिरेटस एयरलाइन्सको विमानबाट भारतको दिल्लीका लागि उडेका थिए । दिल्लीमा करिब ६ घण्टा ट्रान्जिट थियो । दिउँसो तीन बजेतिर दिल्लीबाट भिस्तारा एयरलाइसको उडानबाट काठमाडौँका लागि उडेका उनीहरु अपरान्ह साढे चार बजे त्रिभुवन अन्तराष्ट्रिय विमानस्थलमा अवतरण गरेका थिए ।
काठमाडौं ओर्लिसकेपछि ती युवाले भाइ (मामाको छोरा) लाई बोलाए र लगेज मामाको घरमा राखेर बसको टिकट लिन बसपार्क पुुगे । तर टिकट नपाएपछि त्यस दिन मामाघरमै बसे। गाडी नपाएपछि प्लेनबाट नेपालगञ्ज पुगे । एयरपोर्टसम्म भाइले छोडिदिएका थिए । २१ तारिख अर्थात् ८ चैत शनिबार दिउँसो १२ बजे बुद्ध एयरबाट उनी नेपालगञ्ज पुगेका थिए ।
नेपालगञ्ज ओर्लिएपछि एयरपोर्टबाट अटो रिजर्भ गरेर कोहलपुरसम्म पुगी त्यहाँबाट हाइसमा धनगढी पुगेको उनले बताएका छन्। घरमा पुगेपछि परिवारका सदस्यबाहेक अरु कसैसँग नभेटेको उनले बताएका छन्।