बाँके– कोरोना भाइरस (कोभिड–१९)को संक्रमण परीक्षणका लागि संकलित नमुना लिन नेपालगन्ज गएको नेपाल एयरलाइन्सको विमान दुर्घटनामा परेको छ।
नेपाल एयरलाइन्सको वाई १२ जहाज नेपालगन्ज विमानस्थलमा अवतरण गर्ने क्रममा जहाज रनवेबाट चिप्लिएर घाँसे मैदानमा धस्सिएको हो।
दुर्घटनामा मानवीय क्षति नभएको नेपाल नागरिक उड्डयन प्राधिकरणका महानिर्देशक राजन पोखरेलले बताएका छन्।
स्वास्थ्य मन्त्रालयले कोरोना भाइरस परीक्षणका लागि संकलित नमुना लिन जहाज चार्टर गरेको थियो। जहाजमा पाइलट केबी लिम्बु र को–पाइलट महेशराज पाण्डे थिए। यस्तै, क्याबिन क्रु किरण आचार्य र अन्य २ जना चिकित्सक थिए।