घर बहालमा आधा छुट दिन इटहरी उपमहानगरको आग्रह

इटहरी- उपमहानगरपालिकाले इटहरीका घरधनीसँग लकडाउनका बेला  घरबहालमा ५० प्रतिशत छुट दिन आग्रह गरेको छ।

शनिबार बिहान बसेको नगर कार्यपालिकाको बैठकले नगरपालिकाभित्रका घरधनीलाई घरबहालमा छुट दिन आग्रह गर्ने निर्णय गरेको मेयर द्वारिकलाल चौधरीका प्रेस संयोगक लिलाराज भट्टराईले जानकारी दिए।

त्यस्तै इटहरीका २० वटै वाडाका जनप्रतिनिधिको एक महिनाको सेवा-सुविधा र कर्मचारीको एक हप्ताको तलब राखेर एउटा कोस निर्माण गर्ने पनि उपमहानगरले निर्णय गरेको छ।

कोषको रकम इटहरीका दलित र विपन्न बस्तीमा दैनिक उपभोग्य वस्तुको वितरणमा खर्च हुने उपमहानगरले जनाएको छ।

यता, नेपाली काङ्ग्रेसका इटहरी उपमहानगर सदस्य चेतन धमला लगायतले भने चन्दा उठाएर बिपतसँग जुध्ने योजनाको आलोचना गरेका छन्। उनले विकासको बजेट खर्च गर्न नसकेको नगरपालिकाले रकमान्तर गरेर विपतका बेला खर्चनुपर्ने बताएका छन्।