डडेलधुरा अस्पतालका दुई चिकित्सकले जागिर छोडे  

काठमाडौं- कोरोना भाइरस संक्रमितको उपचारका लागि चिकित्सक र स्वास्थ्यकर्मीलाई व्यक्तिगत सुरक्षाका सामाग्री उपलब्ध नभएको चर्चा चलिरहेका बेला डडेल्धुरा अस्पतालमा कार्यरत दुई जना चिकित्सकले जागिर छोडेका छन्।  

पारिवारिक कारण देखाउँदै दुईजना चिकित्सकले पदबाट राजीनामा गरेको डडेल्धुरा अस्पताल, डडेल्धुराका मेडिकल सुपरिटेन्डेन्ट डा जगदिशचन्द्र बिष्टले बताए।

काम छोड्ने दुबै जना करार सेवामा काम गरिरहेका चिकित्सक हुन्।

अस्पताल स्रोतका अनुसार कोरोनाको जोखिमका कारण बढेको पारिवारिक दबावपछि उनीहरुले जागिर छोडेका हुन्।

तर डा बिष्टले भने एक जनाको बुबा बितेको र अर्कोको पनि पारिवारिक समस्या रहेकाले राजीनामा दिएको जानकारी दिए।

काम गर्ने दुबै जनाले १० दिन जति मात्र काम गरेका छन्।