नेपालगञ्जमा सेना पनि सडकमा

बाँके– ‘लकडाउन’ को चौथो दिन आजदेखि नेपालगञ्जमा नेपाली सेना परिचालन गरिएको छ।

कोरोना भाइरसको जोखिम बढेसंगै सुरक्षा सावधानीका लागि बाँके प्रशासनले बारम्बार मानिसहरुलाई घरबाहिर ननिस्कन भने पनि निषेधाज्ञाको अवज्ञा भइरहेपछि सेनालाई खटाइएको हो।

अहिले नेपालगञ्जका सडक र चोकहरुमा नेपाली सेनाले सशस्त्र र जनपद प्रहरीसँगै खटिएको छ।

बिहीबार बाँकेका प्रमुख जिल्ला अधिकारी कुमार बहादुर खड्को नेतृत्वमा बसेको सुरक्षा समितिको बैठकले सेनालाई पनि सडकमा उतार्ने निर्णय गरेको थियो।

पहिलो दिन र दोस्रो दिन सम्झाईबुझाई मात्र गरेको प्रशासनले तेस्रो दिन बिहीबार साँझदेखि अन्य दिनको तुलनामा सडकमा हिडनेमाथि कडाई गरेको छ ।

सेना पनि सडकमा आएपछि अहिले नेपालगञ्जका सडकमा मानिसको आवतजावत शून्य जस्तै छ ।