काठमाडौं- राष्ट्रिय मानवअधिकार आयोगले सरकारलाई लकडाउनको समयमा नागरिकको स्वास्थ्यप्रति संवेदनशील बन्न आग्रह गरेको छ।
बिहीबार प्रेस विज्ञप्ति जारी गर्दै आयोगले नागरिकको स्वास्थ्यप्रति संवेदनशील बन्दै दैनिक उपभोग्य वस्तुको आपूर्ति व्यवस्थित गर्न सरकारलाई आग्रह गरेको हो।
कोरोना भाइरस संक्रमणको आशंका गरिएका तथा संक्रमितहरुको उपचारमा खटिएका सबै स्वास्थ्यकर्मी, सुरक्षाकर्मी, कर्मचारी तथा तिनका परिवारको आवश्यक स्वास्थ्य सुरक्षा सुनिश्चित गर्न पनि आयोगले सरकारको ध्यानाकर्षण गराएको छ।
आयोगले लकडाउनको अवस्थामा घरमै रहेका अपांग, बालबालिका, ज्येष्ठ नागरिक, महिला तथा अतिविपन्नहरुको लागि आवश्यक पर्ने दैनिक उपभोग्य सामग्रीको अभाव हुन नदिन सरकारलाई सचेत गराएको छ।
नेपालमा समेत कोरोनाको संक्रमण पुष्टि भएपछि उत्पन्न विषम परिस्थिति नियन्त्रणका लागि सरकारको पछिल्ला कदमलाई सकारात्मक रुपमा लिँदै आयोगले वर्तमान जटिल परिस्थितिमा नागरिकको स्वास्थ्यप्रति जिम्मेवार हुन सरकारको प्रमुख दायित्व भएको स्मरणसमेत गराएको छ।
साथै आयोगले लकडाउनको पालना गरी घरभित्रै रहन आमनागरिकलाई आह्वानसमेत गरेको छ।
‘लकडाउनको अवज्ञा गर्नेलाई मानवोचित व्यवहारका साथ कानुनबमोजिम कारबाही गर्न आयोग सरकारलाई आग्रहसमेत गर्दछ’ प्रवक्ता वेद भट्टराईद्वारा हस्ताक्षरित विज्ञप्तिमा भनिएको छ।