स्यानिटाइजरमा कालोबजारी गर्ने पसललाई कारवाही

कैलाली-  धनगढी उप-महानगरपालिका-५, जाईस्थित  शैलेश्वरी आयुर्वेदिक मेडिकल हलले बढी मूल्य लिई सामान बिक्री गरेपछि वाणिज्य आपूर्ति तथा उपभोक्ता संरक्षण कार्यालयले जरिवाना गरेको छ।

स्यानिटाईजरको वास्तविक मूल्य मेटाई मनोमानी ढंगले कायम गरी बिक्री गर्ने शैलेश्वरी आयुर्वेदिक मेडिकल हललाई कार्यालयले २० हजार रुपैयाँ जरिवाना गरेको हो।

मेडिकलले उपभोक्ता संरक्षण ऐन २०७५ को दफा ३८ को खण्ड ख बमोजिम कसुर गरेको कार्यालयले जनाएको छ।

मेडिकल हललाई तोकिएको जरिवाना रकम सात दिनभित्रै दाखिला गर्न भनिएको वाणिज्य आपूर्ति तथा उपभोक्ता संरक्षण कार्यालय कैलालीका प्रमुख कमल बहादुर पुन मगरले जानकारी दिए।

यदि सो अवधिमा जरिवाना बुझाउन अटेर गरे थप कारबाही हुने पनि उनले बताए।