तीनजना बोकेको मोटरसाइकल ट्रकमा ठोकिँदा एकको मृत्यु

काठमाडौं- सरकारले देशव्यापी रुपमा लकडाउन गरेको अवस्थामा तीनजना बोकेर कुदेको मोटरसाइकल दुर्घटना हुँदा एकजनाको मृत्यु भएको छ।

भक्तपुरको जगातीमा गएराति उक्त मोटरसाइकल रोकिराखेको ट्रकमा गएर ठोकिँदा कमलविनायक बस्ने सिन्धुपाल्चोकका २८ वर्षीय उत्तर बहादुर तामाङको मृत्यु भएको हो।

सल्लाघारीस्थित डा. ईवामुरा मेमोरियल अस्पतालमा उपचारका क्रममा उनको गएराति मृत्यु भएको ट्राफिक प्रहरी महाशाखाले जनाएको छ।

दुर्घटनामा घाइते भएका मोटरसाइकलमा पछाडि सवार २८ वर्षकै आकाश तामाङ र १९ वर्षीया कोलसङ डोल्मा तामाङको उपचार भइरहरेको छ। आकाशको अवस्था भने गम्भीर रहेको छ।

राती सवा ९ बजे ना६ख ११०३ नम्बरको ट्रकको पछाडि बा ९० प ४०४० नम्बरको मोटरसाइकल अनियन्त्रित भएर ठोकिएको महानगरीय प्रहरी वृत्त जगातीले जनाएको छ।