काठमाडौं– विश्वव्यापी महामारीकोको रुपमा फैलिएको कोरोना भाइरस प्रत्येक दुई सेकेन्डमा एक जनामा देखिन थालेको छ ।
वर्डओमिटरका अनुसार तिब्र गतिमा फैलिएको कोरोना भाइरस अहिलेसम्म १ सय ९७ देशमा फैलिदा ४ लाख २२ हजार ८ सय २९ जना संक्रमित भएका छन् । मंगबार एकै दिनमा ४३ हजार ८ सय १५ जना संक्रमित भएका छन् ।
यो तथ्यांकलाई हिसाव गर्दा प्रत्येक दुई सेकेन्डमा एक जना नयाँ संक्रमित भेटिन थालेका छन् । २४ घण्टामा ८६ हजार ४ सय सेकेन्ड हुन्छ । कोरोना भाइरसबाट २४ घण्टामा ४३ हजार ८ सय १५ जना नयाँ संक्रमित थपिएका छन् ।
पछिल्लो २४ घण्टामा सबैभन्दा बढि संक्रमित अमेरिकामा भेटिएका छन् । अमेरिकामा मात्रै मंगलबार ११ हजार ८९ जना नयाँ संक्रमित फेला परेका छन् । जसको हिसाव गर्दा अमेरिकामा प्रत्येक ७ सेकेन्डमा एक जना संक्रमित भेटिन थालेको छ ।
यस्तै मंगलबार मात्रै स्पेनमा ६ हजार ९ सय २२ जनामा संक्रमण देखिएको छ भने इटालीमा ५ हजार २ सय ३९ जना नयाँ संक्रमित थपिएका छन । जर्मनीमा ३ हजार ९ सय ३५, फ्रान्समा २ हजार ४ सय ४८ जना , इरानमा १ हजार ७ सय ६२, बेलायतमा १ हजार ४ सय २७ र स्विजरल्याण्डमा १ हजार ८२ जना नयाँ संक्रमित भेटिएका छन् ।
यस्तै नेदरल्याण्ड, अष्ट्रेलिया, क्यानडा, बेल्जियमलगायतका मुलुकमा पनि तिब्र गतिमा कोरोना भाइरस फैलिएको छ । जहाँ प्रत्येक दिन ५ सयदेखि एक हजारसम्म संक्रमित भेटिन थालेको छ ।
यस्तै वर्डओमिटरका अनुसार कोरोनाबाट अहिलेसम्म १८ हजार ९ सय ७ जनाको मृत्यु भएको छ ।
मंगलबार मात्रै २ हजार ३ सय ८४ जनाको मृत्यु भएको छ । जसको हिसाव गर्दा प्रत्येक एक मिनेटमा करिब २ जनाको मृत्यु भइराखेको छ ।
मृत्यु हुनेहरुको संख्या सबै भन्दा बढि इटालीमा रहेको छ । इटालीमा ६ हजार ८ सय २० जनाको मृत्यु भएको छ । यो संख्या चीनमा कोरोनाबाट ज्यान गुमाउनेको भन्दा करिब दोब्बर हो । कोरोना भाइरसको उद्गम देश चीनमा कोरोनाबाट अहिलेसम्म ३ हजार २ सय ८१ जनाको मृत्यु भएको छ ।
बितेको २४ घण्टामा मात्रै इटालीमा ७ सय ४३ जनाको मृत्यु भएको छ । स्पेनमा ६ सय ८० जनाको मृत्यु भएको छ भने फ्रान्समा २४०, अमेरिकामा २ सय २५, इरानमा १ सय २२ जनाले कोरोना भाइरसबाट ज्यान गुमाएका छन।