सरकारले आज (बुधबार)बाट दिनभर खाद्यान्न पसल, पेट्रेल पम्प तथा ग्यास डिपो सञ्चालन गर्न दिने भएको छ। यसअघि बिहान र बेलुकामात्र पसल खोल्न अनुमति थियो । यसो गर्दा भीड बढेपछि दिनभर पसल खोल्न दिएको हो।
महानगरीय प्रहरी आयुक्तको कार्यालय रानीपोखरीका प्रमुख विश्वराज पोखरेलका अनुसार अत्यावश्यक खाद्यवस्तु राखिएका पसल आजबाट दिउँसो पनि खोल्न अनुमति दिइएको छ।
कोरोना रोकथाम तथा नियन्त्रण उच्चस्तरीय समन्वय समितिले गरेको निर्णयमा खाद्यान्नसम्बन्धी सामग्री कुन समयमा बिक्री गर्न पाइने भन्ने विषयमा व्याख्या गरिएको थिएन। यसबाट सर्वसाधारण र पसल सञ्चालकमा अन्योल सिर्जना भएको थियो।
गृह मन्त्रालयका सहसचिव केदारनाथ शर्माले मंगलबार विज्ञप्ति जारी गर्दै स्वास्थ्य, सुरक्षा, खाद्यवस्तु, खानेपानी, दूध, विद्युतलगायत कारोबार गर्ने पसलहरू बन्द नहुने बताउँदै सदाझैँ निर्वाध सञ्चालन गर्न अनुरोध गरेका छन्।