काठमाडौं -क्रिस्चियन धर्मावलम्बीलाई कोरोना भाइरस संक्रमण नहुने भनेर भ्रम फैलाउने एक पास्टरलाई कास्की प्रहरीले पक्राउ गरेको छ।
पोखरामा प्रशस्त कटनी मण्डली सञ्चालन गर्दै आएका ३२ वर्षीय पास्टर केशव आचार्यलाई कास्की प्रहरीले सोमबार बेलुकी पोखरा–२९ पावरहाउसबाट पक्राउ गरेको जनाएको छ।
जिल्ला प्रहरी प्रवक्ता प्रवक्ता डीएसपी राजकुमार केसीले संक्रामक रोगबारे सामाजिक सञ्जालमा अफवाह फैलाएकाले उनलाई पक्राउ गरिएको बताए। आचार्यले भिडियो बनाउँदै प्रभु यसुका अनुयायीलाई कोरोना नलाग्ने दाबी गर्ने अफवाह फैलाएका थिए। उनले बनाएकाे भिडियाे सामाजिक सञ्जालमा भाइरल बनेकाे थियाे।
उनलाई संक्रमण र विपत्का बेला अफवाह फैलाएकाले कानुनी कारवाहीका लागि मंगलबार नै जिल्ला अदालतबाट म्याद थप गराइने केसीले बताए। आचार्य जुम्लाका हुन्।