भैरहवा- रोजगारीको सिलसिलामा भारतका विभिन्न शहरमा रहेका नेपालीहरु रोजगारदाता कम्पनीले बेतलबी बिदा दिएपछि घर फर्किन थालेका छन्।
कम्पनीले विदा दिएपछि घर जान हिँडेकाहरु यतिबेला दशगजामा आएर अलपत्र परेका छन्। नेपाल सरकारले भारतबाट आउनेहरुलाई पनि सोमबार दिउँसोदेखि रोकेपछि उनीहरु बेलहिया स्थित दशगजामा अलपत्र परेका हुन्।
सुनौली नाका हुँदै आएका उनीहरु नेपालको गुल्मी, अर्घाखाँची, स्याङ्जा, पाल्पा, बागलुङ, चितवन, कास्की, म्याग्दी, मनाङ, प्यूठान, दाङ, रोल्पा, कपिलवस्तु, परासी, रूपन्देही लगायत विभिन्न जिल्लाका छन्।
अधिकांश बालबच्चासहित आएका नेपालीहरुले दशगजामा स्वास्थ्यको कारण देखाउदै छेकबार लगाएर रोकिनु दुखद भएको बताए। तीन घण्टादेखि दशगजामै रहेका गुल्मीका वीरबहादुर श्रीशले भने, ‘अर्काको देशमा केही भएन। स्वास्थ्य चेक गर्दै पठायो। अब हामी आउँदाआउँदै यहा रोकिएछ। अब कहाँ जाने उता कम्पनीबाट बिदा लिएर आइयो। यता देश छिर्न पाइएन। ’
सरकारले सूचना प्रवाहमा ढिला गरेकोले भारतबाट आउने धेरै नेपाली दशगजामा रोकिएका छन्। स्थानीय युवा समाजसेवी चक्रबहादुर थापाले भने, ‘उनीहरु आइसकेका छन्। घर आएकालाई फर्काउनु हुन्न। विदेशमा प्लेन चार्टर्ड गरेर आफ्ना नागरिक स्वदेश ल्याउने गरिएको छ। स्वदेश आएकाहरुलाई बरु क्वारेन्टाइनमा राखेर घरघर पठाउँदा उपयुक्त हुन्छ। ’
विद्यार्थी नेतृ लक्ष्मी केसीले सीमा क्षेत्रमा रहेको भैरहवा बहुमुखी क्याम्पस, बेलहियामा रहेको बेलहिया मावि, भैरहवा नमूना उच्च मावि, रूपन्देही क्याम्पस र निजी विद्यालयहरुलाई तत्काल क्वारेन्टाइनको रुपमा परिणत गरेर भारतबाट आएका नेपालीहरुलाई त्यहाँ राख्नुपर्ने बताइन्।
उनले भनिन्, ‘सीमावर्ती क्षेत्रमा रहेका क्याम्पस, कलेज तथा विद्यालयलाई क्वारेन्टाइन बनाउनुपर्छ। निश्चित समय त्यहाँ राखेर मात्रै घर जाने गरी प्रबन्ध मिलाउनुपर्छ।’