कैदीबन्दी रिहाइ प्रक्रिया सुरु

काठमाडौं– कोरोना भाइरस संक्रमणको जोखिममा रहेको भन्दै निवदेन दिएका कैदीबन्दीलाई रिहाइ गरिने भएको छ।

सर्वोच्च अदालतको आदेशपछि कारागार व्यवस्थापन विभागले उनीहरूको रिहाइ प्रक्रिया सुरु गरेको हो।

विभागका महानिर्देशक प्रदीपराज कँडेलले भने, ‘सर्वोच्च अदालतको आदेशबमोजिम कैदीबन्दीलाई रिहाइ प्रक्रिया सुरु गरिएको छ।’

उनले देशभरका विभिन्न कारागारमा रहेका कैदीबन्दीलाई उनीहरूको मागबममोजिम रिहाइ गरिने बताए। कँडेलका अनुसार चरणमा अभद्र व्यवहारलगायतका मुद्दामा सजाय भोगिरहेका कैदीबन्दी रिहा हुनेछन्। बाँकी कैदबापत पैसा लिएर कैदीबन्दीलाई रिहा गरिने कँडेलले बताए।

कोरोना भाइरसको त्रासमा रहेका कैदीबन्दीले रिहाइको माग गर्दै आएका छन्। सर्वोच्च अदालतले शुक्रबार कैदबाट छोडिपाउन निवेदन परेमा उपयुक्त देखिए न्यायाधीशको इजलासबाट आवश्यक आदेश गरी छोड्ने व्यवस्था गर्ने आदेश दिएको थियो।

सर्वोच्चको आदेशमा छ, ‘...कारागारमा रहने कैदी बन्दीको भीडभाड कम गर्ने प्रयोजनार्थ मुलुकी फौजदारी कार्यविधि संहिता, २०७४ को दफा १५५ अनुसारको कैदबापत रकम लिई कैदबाट छोडिपाउन निवेदन परेमा रकम लिई कैदबाट छोडिदिन उपयुक्त देखिए न्यायाधीशको इजलासबाट आवश्यक आदेश गरी छोड्ने व्यवस्था गर्ने।’