जोर विजोर- इटहरी इटहरी उपमहानगरपालिकाले कोरोना भाइरस संक्रमणको जोखिम न्युनिकरणका लागि उपमहानगर क्षेत्रभित्र जोरविजोर प्रणाली लागू गर्ने भएको छ।
सोमबार बसेको इटहरी उपमहानगरको कार्यपालिकाको आकस्मिक बैठकले उपमहानगरपालिका क्षेत्रभित्र सञ्चालनमा रहेका सिटी सफारी, अटो र म्याजिक गाडीहरु दैनिक सञ्चालनका लागि जोरविजोर प्रणाली लागू गर्ने निर्णय गरेको हो।
त्यस्तै बैठकले उपमहागर क्षेत्रभित्र कोरोना संक्रमण भित्रिन र फैलिन नदिन तथा शंकास्पद व्यक्तिहरुको निगरानी र उपचारको व्यवस्थासमेत मिलाउन नगर प्रमुख द्वारिकालाल चौधरी संयोजक र उपमेयर लक्ष्मी गौतम सहसंयोजक रहेको नगरस्तरी समिति गठन गरेको छ।
त्यस्तै बैठकले सबै वडाहरुमा वडाअध्यक्षको संयाजकत्वमा समन्वय समिति गठन गरेको छ।
त्यस्तै बैठकले अत्यावश्यक, दैनिक उपभोग्य सामान बाहेकका अन्य पसल तथा बजार आगामी चैत २१ गतेसम्मका लागि बन्द गर्न व्यापारी, उद्योगी, व्यवसायीहरुमा अनरोध गर्दै नगरवासीलाई घर बाहिर ननिस्कन आग्रह गरेको छ।
इटहरीको जनता बहुमुखी क्याम्पसमा २०० जना क्षमता भएको क्वारेन्टाइन सेवा स्थापना गरिएको छ। त्यस्तै अन्य सामुदायिक विद्यालयहरुमा क्वारेन्टाइन बनाउने निर्णयसमेत बैठकले गरेको छ।