सोमबार, साउन २६, २०७७

समाचार

वडाध्यक्ष राजस्व छलीमा संलग्न, विशेष अदालतमा भ्रष्टाचार मुद्दा दायर

1576645442akhtiyar.jpg

काठमाडौं- राजस्व छलीको अभियोगमा वीरगन्ज महानगरपालिका–१६ का वडाध्यक्षसहित ३ जनाविरुद्ध अख्तियार दुरुपयोग अनुसन्धान आयोगले मुद्दा दायर गरेको छ।

जग्गा खरिदबिक्री गर्दा गलत लिखत तयार गरी राजस्व छलेको अभियोगमा अख्तियारले वडा अध्यक्ष श्यामबाबुप्रसाद चौरसियासहित जग्गा खरिदकर्ता र बिक्रीकर्ताविरुद्ध विशेष अदालत काठमाडौँमा शुक्रबार मुद्दा दायर गरेको हो।

आयोगका प्रवक्ता प्रदीपकुमार कोइरालाले जग्गामा गलत बाटो सिफारिस गरी राजस्व छली गरेको अभियोगमा जग्गा बिक्रीकर्ता जहरातीमिया धुनिया र खरिदकर्ता ग्यान्ती देवीविरुद्ध मुद्दा दायर गरेको जानकारी दिए।

अख्तियारका अनुसार वडा नम्बर १६ साबिक इनर्वाभाठा (बी) वडा नम्बर ५ को जग्गाधनी धुनियाको जग्गामा २८ फिटको पिच बाटो देखिएको र मालपोत कार्यालय, पर्साको आर्थिक वर्ष २०७४/०७५ को जग्गाको न्यूनतम मूल्यांकन पुस्तिकाबमोजिम उक्त जग्गाको प्रतिकठ्ठा ६० लाख देखिएको भए पनि ११ धुर जग्गा बिक्री गर्दा ३३ लाख न्यूनतम मूल्यांकन हुनुपर्नेमा २५ लाख ३० हजार मात्रै थैली रकम राखेको खुलेको छ।

थैली रकम कम राख्दा रजिस्ट्रेसन दस्तुर ९४ हजार ८ सय ७५ र पुँजीगत लाभकर ८२ हजार ५ सय गरी १ लाख ७७ हजार ३ सय ७५ कम हुने गरी राजस्व दाखिला गरी राजस्व हानि पु¥याएको पाइएको अख्तियारले जनाएको छ।

वडाध्यक्ष चौरसियाले जग्गा खरिदबिक्री हुने बेला घरबाटो सिफारिस गर्दा २८ फिटको पिच बाटो भएको सिफारिसपत्र नराखी १५ फिटको ग्राबेल बाटो भनी गलत लिखत तयार गरेको खुलेको छ।

अख्तियारले वडाध्यक्ष चौरसियाविरुद्ध भ्रष्टाचार निवारण ऐनबमोजिमको कसुरमा बिगो १ लाख ७७ हजार ३ सय ७५ कायम गरी सजायको माग दाबी लिइएको छ।।

जग्गा बिक्रीकर्ता जहराती मिया धुनियाविरुद्ध बिगो ८२ हजार ५ सय कायम गरी बिगो रकम असुल गरी जफत हुन मागदाबी लिइएको छ।

यस्तै जग्गा खरिदकर्ता देवीविरुद्ध बिगोस्वरुप ९४ हजार ८ सय ७५ कायम गरी बिगो रकम असुल गरी जफत हुन मागदाबी लिइएको छ।

अख्तियारले राष्ट्रिय पुनर्निर्माण प्राधिकरणअन्तर्गत कास्कीको मादी गाउँपालिका–९ का सेवाग्राहीसँग ४० हजार पाँच सय रुपैयाँ घुस लिँदै गरेको अवस्थामा पक्राउ परेका एक सब–इन्जिनियरविरुद्ध पनि शुक्रबार मुद्दा दायर गरेको छ।

सब–इन्जिनियर नवलेशकुमार रौनियारले भूकम्पबाट भत्किएको घर निर्माण गरेवाफत सरकारबाट प्रदान हुने अनुदान रकमको दोस्रो र तेस्रो किस्ता भुक्तानी गर्दा घुस लिइरहेको अवस्थामा अख्तियारको पोखराबाट खटिएको टोलीले नियन्त्रणमा लिएको थियो।

प्रतिक्रिया दिनुहोस्