कोरोना भाइरस (कोभिड-१९) को उच्च जोखिमलाई मध्यनजर गर्दै सरकारले छिमेकी देश भारत र चीनसँगका सीमा नाका बन्द गर्ने निर्णय गरेको छ।
आइतबार बसेको मन्त्रिपरिषद् बैठकले दुवै छिमेकीसँगका नाकाबाट मानिसको ओहोरदोहोर बन्द गर्ने निर्णय गरेको हो।
बैठकले कोरोना भाइरसको महामारीबाट जोगिन चिकित्सकले प्रयोग गर्ने व्यक्तिगत सुरक्षाका उपकरण, मास्क, थर्मोमिटर, भेन्टिलेटर, मनिटरलगायत सामग्री किन्न ५० करोडको केन्द्रीय कोष खडा गर्ने निर्णय गरेको छ।
उक्त कोषका लागि सबै मन्त्रीले आफ्नो १–१ महिनाको पारिश्रमिक दिने भएका छन्।
प्रधानमन्त्री केपी शर्मा ओलीले यसअघि नै अत्यावश्यक बाहेकका सबै सेवा बन्द गर्ने घोषणा गरिसकेका छन्।
प्रधानमन्त्रीको घोषणाअनुसार नै सोमबारदेखि मुलकभर लामो दूरीका सवारी साधन बन्द हुँदैछन्।