विद्यार्थीलाई घरभाडा छुटको व्यवस्था गर्न नेविसंघको माग

काठमाडौं- नेपाल विद्यार्थी संघले विश्वव्यापी महामारीका रुपमा फैलिएको कोरोना भाइरस संक्रमणको जोखिम बढिरहेका बेला विभिन्न सरोकारवाला निकायको ध्यानाकर्षण गराएको छ।

नेविसंघले संकटको समय रहेकाले काठमाडौं बाहिर घर भएका र घर जान चाहने विद्यार्थीलाई आ–आफ्नो घरसम्म पुग्नका लागि निशुल्क पठाउने व्यवस्था गर्न माग गरेको छ।

त्यस्तै काठमाडौंमा भाडामा बसिरहेका विद्यार्थीलाई संकटको अवधिभर ५० प्रतिशत छुटको व्यवस्था मिलाउनसमेत माग गरेको छ।

नेविसंघले हवाई सेवा सञ्चालकहरुले भाडा बढाइरहेको सुनिएको भन्दै त्यस्तो नगर्न चेतावनी पनि दिएको छ।

नेविसंघ अध्यक्ष राजीव ढुंगानाले आइतबार एक विज्ञप्ति जारी गर्दै जनतालाई घर बसीबसी सूचना प्राप्त गर्न र घरमा समय बिताउन सहजताका लागि इन्टरनेट सेवा प्रदायकहरुलाई सहुलियत वा कर छुट दिएर संकट अवधिभर इन्टरनेट सेवा निशुल्क उपलब्ध हुने व्यवस्था गर्न सरकारसँग माग गरेका छन्।

त्यस्तै भारतसँगका सबै सीमानाका बन्द गर्न नेविसंघले माग गरेको छ।

यस्तै अत्यावश्यक उपभोग्य वस्तुहरुको कृतिम अभाव, महंगी र कालोबजारीको प्रभावकारी अनुगमन र नियन्त्रणका लागि पनि सरकारको ध्यानाकर्षण गराएको छ।