बुधबार, जेठ १४, २०७७

समाचार

कोरोना फैलिरहँदा आम मानिसको ख्याल गर्ने मनकारी

1590058520Milton.jpg

जनकपुरधाम-  कोरोना भाइरस (कोभिड-१९) संक्रमणबाट जोगिन सहरी क्षेत्रका नागरिक जागरुक देखिए पनि ग्रामीण भेगमा अझै समस्या देखिन्छ। यसै समस्यालाई बुझेर कोरोना संक्रमणबाट जोगिने उपायबारे जनचेतना फैलाउनेदेखि सरसफाइसम्ममा जुटेका छन्, धनुषाको मुखियापट्टी मुसहरनिया गाउँपालिका कोल्हुवा बस्ने सुनिल झा ‘मिन्टन’।

पेशाले इन्जिनियर सुनिलले कोरोना संक्रमणको हल्ला चलेलगत्तै धनुषाको ग्रामीण भेगमा जनचेतना फैलाउन जुटे। कोरोनाबाट जोगिन सरसफाइ, मास्कको प्रयोग, सामाजिक दूरी लगायतका सन्देश रेकर्ड गर्न लगाएर ग्रामीण भेगमा बजाउन लगाए। इ–रिक्सा भाडामा लिएर धनुषा निर्वाचन क्षेत्र नम्बर ३ को सबै गाउँमा कोरोनाबाट जोगिन सन्देश बजाउन लगाइएको उनी बताउँछन्।

“कोरोनाबारे सहरी क्षेत्रमा जागरुकता रहे पनि ग्रामीण भेगमा समस्या भएजस्तो लाग्यो, त्यहाँ संक्रमण हुन नदिन सरसफाइमा सबैले ध्यान दिनु जरुरी थियो,” सुनिल भन्छन्, “ग्रामीण क्षेत्रका आमनागरिकबीच जनजेतना फैलाउन सन्देश माइकिङ गरेर सन्देश प्रसारण राम्रो उपाय थियो।”

जनचेतना फैलाउन माइकिङ गरेर जनचेतना फैलाउनबाहेक उनले ग्रामीणका साथै जनकपुरको कतिपय वडामा समेत लामखुट्टेको औषधि छर्केर सेनिटाइजसमेत गरेका छन्। गर्मी बढेसँगै जनकपुरसहित ग्रामीण भेगमा लामखुट्टेको प्रकोप बढ्न थालेपछि सुनिल लामखुट्टेविरुद्धको औषधि छर्केर सेनिटाइज गरिरहेका छन्।

“गर्मी बढेको छ, गर्मी बढेसँगै लामखुट्टेको समस्या व्याप्त हुन्छ,” उनले भने, “कोरोना संक्रमणको सन्त्रासबीच लामखुट्टेको प्रकोप बढ्न थालेपछि ग्रामीण भेगमा औषधि छर्कन लगायौं।”

उनले आफ्नौ निजी खर्चमा धनुषाको धनौजी गाउँपालिकाका सबै वडाका साथै नगराइन नगरपालिकाको डेवडिहा, जनकपुरधाम उपमहानगरपालिकाको कतिपय वडामा लामखुट्टे निरोधक औषधि छर्कन लगाएका छन्। जनकपुरको बाँकी वडामा पनि लामखुट्टे निरोधक औषधि छर्कने योजना रहेको उनले सुनाए।

यसबाहेक ‘लकडाउन’का कारण समस्यामा परेका गरिब तथा विपन्न परिवारलाई सुनिलले लगातार एक साता खाना खुवाएका थिए। जनकपुरको रामानन्द चोकमा उनले एक सातासम्म गरिब तथा विपन्न परिवारका लागि खानाको व्यवस्था गर्न लगाएका थिए।

निरन्तर सामाजिक कार्य गरिरहने सुनिललाई मिडियामा आउने रहर कहिल्यै जागेन। “म आफ्नो कर्तव्यमा विश्वास गर्छु, मिडियामा आउने रहर मलाई कहिल्यै जागेन, समस्यामा परेकालाई सहयोग गर्न पाउँ, मेरो इच्छा यति मात्रै हुन्छ,” सुनिलले भने।

 

प्रतिक्रिया दिनुहोस्