काठमाडौं- कोरोना भाइरस (कोभिड–१९) को महामारी रोक्न विश्वभरका देशले एकअर्का देशसँगको आवतजावत बन्द गर्नुका साथै देशभित्रको पनि आवागमन रोकेका छन्।
नेपाललेसमेत सोमबारदेखि देशभरको सवारी बन्द गर्ने तयारी गरेको छ। एउटा सहरबाट अर्को सहर जाने सवारी साधनहरु बन्द हुँदैछन्। धेरैजसो देशहरुले आफूलाई लगभग ‘लक डाउन’ गरेका छन्।
तर विश्व स्वास्थ्य संगठन डब्ल्युएचओले भने लक डाउन कोरोना भाइरसको प्रकोप नियन्त्रणका लागि पर्याप्त नभएको बताएको छ।
डब्ल्युएचओका कार्यकारी निर्देशक माइक रायनले आइतबार यस्तो बताएका हुन्।
उनले लक डाउनसँगै त्यसपछिको अवस्थाबारे धेरै देशको तयारी फितलो देखिएको बताए।
उनले लक डाउनसँगै त्यसपछिको आवश्यकता के हो, कसलाई तत्काल सहयोगको खाँचो छ, कसलाई आइसोलेशनमा राख्नुपर्ने अवस्था छ, कसलाई पुनर्स्थापनाको तयारी छ त्यसमा ध्यान दिनुपर्ने बताए।
बीबीसीसँगको कुराकानीमा रायनले कोरोना नियन्त्रण र रोकथामका लागि थुप्रै खोपहरु बनेको तर एउटा खोपको मात्रै अमेरिकामा परीक्षण भएको बताए।
बेलायतमा कहिले खोप आइपुग्ला त भन्ने प्रश्नमा उनले यो विषय भावनात्मक विषय नभएको भन्दै यथार्थवादी हुन सुझाव दिए।
उनले खोप तयार हुन कम्तीमा एक वर्ष लाग्ने स्पष्ट पारे।
उनले भने, ‘खोप त आउला तर अहिले के गर्ने, अवस्थालाई कसरी सामान्य बनाउने त्यो ठूलो कुरा हो।’