बुधबार, जेठ १४, २०७७

समाचार विदेश

ब्राजिलमा एकै दिनमा २१ हजार बढी संक्रमित, स्वास्थ्य सेवा कोल्याप्स हुने चेतावनी

1590035229brazilcoronavirus-ns.jpg

काठमाडौं- तीव्र गतिमा फैलिएको कोरोना भाइरसबाट दक्षिण अमेरिकी देश ब्राजिलमा एकै दिन (बुधबार) २१ हजार ४ सय ७२ जना संक्रमित भएका छन्। ९ सय ११ जनाको मृत्यु भएको छ।

प्रत्येक दिन संक्रमित बढ्दै गएको ब्राजिलमा मंगलबार १६ हजार ५ सय १७ जनामा संक्रमण पुष्टि भएको थियो। सोमबार १४ हजार २ सय ८८ जना संक्रमित थपिएका थिए।

ब्राजिलमा अहिलेसम्म कोरोनाबाट २ लाख ९३ हजार ३ सय ५७ जना संक्रमित भएका छन् भने १८ हजार ८ सय ९४ जनाको मृत्यु भएको छ।

कोरोनाका संक्रमित ह्वात्तै बढेपछि ब्राजिलको स्वास्थ्य सेवामा ठूलो दबाब परेकाले केही दिनमै स्वास्थ्य सेवा कोल्याप्स हुन सक्ने चेतावनी दिइएको छ।

यसैबीच, मुलुक महामारीको नयाँ इपिसेन्टर बन्दै गएपछि राष्ट्रपति जायर बोल्सोनारोले मलेरियाविरुद्धको औषधि हाइड्रोक्सिक्लोरोक्विनलाई कोरोना भाइरसको उपचारमा प्रयोग गर्न सुझाएका छन्।

कोरोनाको विषाणु मार्छ भन्ने कुनै प्रमाण नरहेको हाइड्रोक्सिक्लोरोक्वीनले उल्टै मुटुमा समस्या हुनसक्ने चेतावनी वैज्ञानिकहरुले दिए पनि बोल्सोनारोले उक्त औषधि प्रयोगमा स्वीकृति दिएका हुन्।

अमेरिकी राष्ट्रपति डोनाल्ड ट्रम्पले नै खाइसकेको औषधि भएकाले खान उनको सुझाव थियो ।

प्रतिक्रिया दिनुहोस्