बाँके– बाँकेको नेपालगञ्जस्थित नेपाल–भारत सीमाको जमुनाहा नाका एक हप्ताका लागि बन्द गर्ने निर्णय भएको छ।
विश्वभर फैलिएको कोरोना भाइरसको रोकथामका लागि आइतबारदेखि एक हप्ताका नाका बन्द गर्ने निर्णय गरिएको बाँकेका प्रमुख जिल्ला अधिकारी कुमार बहादुर खड्काले जानकारी दिए ।
यस अवधिमा सामानमात्र ल्याइने तर यात्रु आवतजावतमा भने पूर्ण रुपमा रोक लगाइएको खड्काले बताए। प्रजिअ खड्काले अत्यावश्यक सेवामा भने रोक नलगाइने जानकारी दिए।
भारतको बहराइच जिल्लाको रुपैडिया बजारमा दुवै देशका अधिकारीहरुबीच आइतबार भएको छलफलमा उक्त सहमति भएको हो। यसअघि दुवै देशका अधिकारीहरुबीच नेपालगञ्जमा भएको बैठकले जमुनाहा नाकाबाट आवत–जावत गर्नेहरुको स्वास्थ्य परीक्षण कडा बनाउने निर्णय गरेको थियो।
भारतबाट दैनिक हजारौंको संख्यामा मानिसहरु आवतजावत गर्न थालेपछि कोरोना संक्रमण फैलिने जोखिम बढेको छ। भारतमा कोरोना संक्रमण फैलिँदै गएपछि नेपालीहरु धमाधम स्वदेश फर्किरहेका छन्।