काठमाडौं- काठमाडौं उपत्यकामा खाना पकाउने ग्यासको हाहाकार भएको गुनासो बढेपछि आज (आइतबार)बाट ग्यासको अतिरिक्त बिक्री केन्द्र (आउटलेट) सञ्चालन हुने भएको छ ।
नेपाल आयल निगमले एलपी ग्यास उद्योग संघको सहकार्यमा २२ वटा ग्यास उद्योगले बिहान १० देखि ५ बजेसम्म अतिरिक्त बिक्री केन्द्र सञ्चालन गर्ने भएका हुन् ।
साबिकका डिपो, डिलर र बिक्री केन्द्र पनि पूर्ववत् सञ्चालनमा रहनेछन्। यस्ता आउटलेटबाट उपभोक्ताले खाली सिलिन्डर साटेर भरिएका सिलिन्डर तत्कालै प्राप्त गर्न सक्नेछन्। तर एकजना उपभोक्ताले एक थान मात्रै सिलिन्डर पाउने व्यवस्था गरिएको निगमले जनाएको छ ।
कोरोना भाइरसको त्राससँगै उपत्यकामा बसोबास गर्ने उच्च मध्यम वर्ग र उच्च वर्गले अत्यधिक संख्यामा खाना पकाउने ग्यासको सञ्चित गरेपछि
निम्न वर्ग, अति निम्न वर्ग र मध्यम वर्गले ग्यास पाउन छाडेका कारण यस्तो गरिएको निगमले जनाएको छ ।
निगमले प्रतिसिलिन्डर एक हजार तीन सय ७५ रुपैयाँ मूल्य तोकेको छ। निगमका अनुसार शनिबार उपत्यका केन्द्रित ग्यास उद्योगका लागि ३८ बुलेट आयात भएको छ।