गड्डाचौकी नाकाबाट स्वदेश फर्कने यात्रुको चाप

कञ्चनपुर– कोरोना भाइरस (कोभिड–१९)को संक्रमण भारतमा फैलन थालेपछि कञ्चनुपरको पश्चिमी सीमानाका गड्डाचौकी भएर स्वदेश फर्कने यात्रुको भीड लागेको छ।

पछिल्लो तीन दिनयता गड्डाचौकी सीमानाकाबाट नेपाल फर्कने यात्रुको चाप बढेको हो। जसका कारण सीमानाकामा राखिएको हेल्थ डेस्कमा यात्रुको स्वास्थ्य चेकजाँच गर्न निकै कठिनाइ भएको छ। 

आज (शनिबार) बिहान झन्डै तीन हजारभन्दा बढी यात्रु भारतबाट नेपाल फर्केको बताइएको छ।

भारततर्फ जान रोक

भारतीय पक्षले भारततर्फ जाने सबै सवारीसाधन र नेपाली यात्रुलाई रोक लगाएको छ। भारतीय नागरिकलाई भने भारत प्रवेश गर्न दिइएको छ। भारतले कोरोना भाइरस रोकथामका लागि ‘जनता कफ्यु’को घोषणा गरेपछि त्यहाँ मजदूरी गर्ने नेपाली स्वदेश फर्कन थालेका छन्।

रासस