नक्कली शैक्षिक प्रमाणपत्रधारीविरुद्ध मुद्दा

काठमाडौं- नक्कली शैक्षिक योग्यताको प्रमाण पत्र पेश गरेर जागिर खाने ७ जनासहित १० जनाविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ।

जागिर खाँदा नक्कली शैक्षिक प्रमाणपत्र पेश गर्ने शिक्षक, कर्मचारीसहित घुस लिनेविरुद्ध अख्तियारले शुक्रबार विशेष अदालतमा मुद्दा दायर गरेको हो।

नक्कली शैक्षिक प्रमाणपत्रधारी सूर्योदय उच्च माध्यमिक विद्यालय, हुम्लाका शिक्षक जितेन्द्र कुमार झाविरुद्ध मुद्दा दायर गरिएको छ। झाले शिक्षाशास्त्र विषयमा अध्यापन नगरेको र शैक्षिक तालिम पनि नलिएर सप्तरीबाट नक्कली अध्यापन अनुमति पत्र लिएर जागिर खाएको खुलेको अख्तियारले जनाएको छ।

यस्तै साझापुर उच्च माध्यमिक विद्यालय, मेघौली–४ चितवनमा राहत दरबन्दीका तत्कालीन शिक्षक नारायण शर्माले स्नातक तहको नक्कली शैक्षिक योग्यताको प्रमाण पत्र पेश गरेर जागिर खाएको खुलेको अख्तियारले जनाएको छ।

यस्तै माध्यमिक विद्यालय, लगडी गदियानी, सिरहामा प्रावि द्वितीय श्रेणीमा कार्यरत राम नारायण यादवले विहार विद्यालय परीक्षा समिति, पटना, भारतबाट हाइस्कुल तह पास गरेको नक्कली प्रमाण पत्र पेश गरी जागिर खाएको खुलेको अख्तियारले जनाएको छ।

उनले २०४६ भदौ १ देखि प्राथमिक शिक्षकमा अस्थायी नियुक्ति भई २०४८ भदौ १२ गते सोही पदमा स्थायी नियुक्ति लिएको खुलेको छ।

नेपाल विद्युत प्राधिकरण, ग्रिड महाशाखा, चौकिटोल, हेटौडामा कार्यरत हेल्पर लोकनाथ खनालले नेपाल माध्यमिक विद्यालय अमलेखगञ्ज, बाराबाट कक्षा ९ पास गरेको प्रमाण पत्र  पेश गरेर जागिर खाएको खुलेको छ। २०५४ सालबाट ज्यालादारीमा सरकारी सेवा सुरु गरी २०६८ सालमा जुनियर हेल्पर पदमा स्थायी नियुक्ति लिएर उनी हाल सम्म कार्यरत रहेको अख्तियारले जनाएको छ।

यस्तै तनहुँको भानु नगरपालिकामा कार्यालयका सहयोगी हेलन गुरुङले हिमालय बोर्डिङ स्कुल चुँदी, तनहुँबाट कक्षा ८ पास गरेको नक्कली शैक्षिक योग्यताको प्रमाणपत्र पेस जागिर खाएको खुलेको अख्तियारले जनाएको छ।

उनले २०७५ बैशाख २० गतेबाट जागिर खाइरहेकोले उनीविरुद्ध मुद्दा दायर भएको अख्तियारले जनाएको छ।

यस्तै नेपाल विद्युत प्राधिकरण जलेश्वर महोत्तरीका तत्कालीन सुपरभाइजर महन्थ मण्डलले पनि विहार संस्कृत शिक्षा बोर्ड पटना भारतबाट मध्यमा तह पास गरेको नक्कली शैक्षिक योग्यताको प्रमाण पत्र पेश गरी जागिर खाएको खुलेको छ।

यस्तै नेपाल विद्युत प्राधिकरण, हेटौंडा वितरण केन्द्र, हेटौंडामा कार्यरत इलेक्ट्रिसियन शंकर बहादुर तामाङले पनि त्रिभुवन माध्यमिक विद्यालय नवलपुर, हेटौंडाबाट कक्षा ८ पास गरेको नक्कली शैक्षिक योग्ताको प्रमाण पत्र पेश गरी २०५० सालमा कुल्ली पदमा स्थायी नियुक्ति लिएको खुलेको छ।

यस्तै जिल्ला प्रशासन कार्यालय, मोरङका खरिदार टेकबहादुर श्रेष्ठसहित २ जनाविरुद्ध ६ लाख रुपैयाँ बिगो माग दाबीसहित अख्तियारले मुद्दा दायर गरेको छ।

बेलबारी नगरपालिका–२ को कार्यालय बाहिर लेखापढी व्यवसाय गर्ने तीर्थराज गिरीले सेवाग्राहीको नागरिकता प्रमाणपत्रमा भारतीय सेनामा कार्यरत रहेको कागजात अनुसार नाम र जन्म मिति सच्याउन सेवाग्राहीबाट लिएको ६ लाख रुपैयाँ घुससहित दुई जनालाई अख्तियारको टोलीले पक्राउ गरेको थियो।

खरिदार श्रेष्ठको मिलोमतोमा गिरीले कार्यालयमा खर्च लाग्छ भनेर पदमबहादुर लिम्बु भन्ने बमबहादुर लिम्बुको नागरिकता प्रमाणपत्रमा जन्म मिति संशोधन गरेर ६ लाख रुपैयाँ घुस लिएको खुलेको छ।

गिरीले पाँच लाख आफैले राखेर १ लाख श्रेष्ठलाई दिएको अनुसन्धानबाट खुलेको भन्दै अख्तियारले श्रेष्ठविरुद्ध १ लाख र गिरीविरुद्ध ५ लाख बिगो माग दाबी गरेको छ।

यस्तै उच्च सरकारी वकिल कार्यालय, बुटवलमा कार्यालय सहयोगी पदमा महेन्द्र यादवविरुद्ध १५ हजार बिगो माग दाबी गर्दै अख्तियारले मुद्दा दायर गरेको छ।