काठमाडौं- सरकारले विदेश जाने तयारीमा बसेका तर जान नपाएकाहरुलाई रोजगारी दिने भएको छ।
कोरोनाको कारण टिकट लिएर बसेका वा केही दिनभित्र विदेश जान चाहेकाहरु सरकारले खाँडी मुलुक लगायतका देशमा जान रोकेपछि समस्यामा परेका थिए। ति समस्यामा परेकाहरुलाई सरकारले प्रधानमन्त्री रोजगार कार्यक्रममा आवद्ध हुन सरकारले आग्रह गरेको हो।
विहिबार पत्रकार सम्मेलन गर्दै सरकारका प्रवक्ता डा.युवराज खतिवडाले विदेश जानको लागि तयारी गरेका तर विदेश जान नपाएकाहरुलाई स्वदेशमा नै ‘प्रधानमन्त्री रोजगार कार्यक्रम’ मा आवद्ध हुन आग्रह गरेका छन्।
उनले भने, ‘म टेवुल वर्क मात्र गर्छु भन्न चाँहि पाउनुहुन्न सानो काम भए पनि यही गर्छु भन्नेहरु आउनुहोस् प्रधानमन्त्री रोजगार कार्यक्रममा दर्ता हुनुहोस् र काम गर्नुहोस् सरकारले तपाईहरुलाई रोजगारी दिन्छ।’
विदेशमा जान नपाए पनि नेपालमा नै बेरोजगार भएर नबस्नुहोस् विदेशमा जाने समय यही लगाउनुहोस् डा.खतिवडाले भने।
प्रधानमन्त्री रोजगार कार्यक्रमको लागि सरकारले चालू आर्थिक वर्षको लागि ५ अर्ब १ करोड रुपैयाँ बजेट छुट्याएको छ।
सो रकम विषेशगरी सडक निर्माण सुधार लगायतका काममा खर्च हुने गरी श्रम तथा रोजगार मन्त्रालयले कार्यायोजना बनाएको छ।