दक्षिण एसियामा ५७८ मात्र संक्रमित, ६ को मृत्यु

काठमाडौं– दक्षिण एशियाका आठ राष्ट्रमा हालसम्म ५७८ जनामा मात्र कोरोना भाइरस (कोभिड–१९) संक्रमण देखिएको छ।

विश्व स्वास्थ्य संगठन (डब्ल्यूएचओ)का अनुसार ६ जनाको मृत्यु भएको छ।

मृत्यु हुनेमध्ये तीन संक्रमित भारतका हुन्। त्यस्तै पाकिस्तानमा दुईजना र बाङ्लादेशमा कोभिड–१९ का कारण एक जनाको ज्यान गएको छ।

दक्षिण एसियाली राष्ट्र म्यानमारमा एउटा पनि संक्रमण देखिएको छैन।

नेपाल र भुटानमा एक/एक जनामा संक्रमण देखिएको थियो। दुवै संक्रमणमुक्त भइसकेका छन्।

सबैभन्दा धेरै पाकिस्तानमा ३०१ जनामा संक्रमण देखिएको छ। भारतमा १७४, श्रीलंकामा ५२ र अफ्गानिस्तानमा २२ जनामा संक्रमण भएको पुष्टि भएको छ।

बाङ्लादेशमा १४ र माल्दिभ्समा १३ जनामा संक्रमण देखिएको छ। दक्षिण एसियाका ८ राष्ट्रमा करिब एक अर्ब ९३ करोड जनसंख्या छ।