काठमाडौं- ट्रकभित्र १७ वर्षीया एक किरोशोरीलाई सामूहिक बलात्कार गरेको अभियोगमा प्रहरीले काठमाडौंको थानकोटबाट ३ युवकलाई पक्राउ गरेको छ।
महानगरीय प्रहरी वृत थानकोटको टोलीले दाङको राप्ती गाउँपालिकाका–२४ वर्षीय संजय मगर, रामेछापका १९ वर्षीय कपिल खड्का र सिन्धुली सुनकोशी गाउँपालिकाका १८ वर्षीय पासाङ तामाङलाई नियन्त्रणमा लिएको जनाएको छ।
पक्राउ परेका तीनैजना ट्रकका सहचालक हुन्। उनीहरुले मंगलवार राति काठमाडौंको चन्द्रागिरी नगरपालिका-१५ तीनथानमा रोकिराखेको ना३ख ६९४ नम्वरको ट्रकभित्र १७ वर्षीय किशोरीलाई सामूहिक बलात्कार गरेकाे महानगरीय प्रहरी वृत थानकोटका प्रमुख डिएसपी धनश्याम श्रेष्ठले जानकारी दिए।
काठमाडौंबाट धादिङ घर जान लागेकी किशोरीलाई थानकोटबाट ट्रकमा लगिदिने प्रलोभन देखाएर रातिको समयमा ट्रकभित्र बलात्कार गरेको खुलेको प्रहरीले जनाएको छ।
डिएसपी श्रेष्ठका अनुसार मध्यरातमा एक्लै हिँडिरहेको समयमा प्रहरीको गस्ति टोलीले किशोरीलाई देखेपछि सोधपुछ गर्दा उनी बलात्कारमा परेको खुलेको हो। पक्राउ परेकाविरुद्ध मुलुकी अपराध संहिता २०७४ को करणी सम्वन्धि कसुरमा अनुसन्धान भइरहेको प्रहरीले जनाएको छ।