कोरोना भाइरसको खोप आज मान्छेमा परीक्षण गरिने

काठमाडौं- विश्वव्यापी महामारीको रूपमा फैलिएको कोरोना भाइरसविरुद्धको खोप आज (सोमबार) मान्छेमा परीक्षण गरिने भएको छ ।

अमेरिकामा यो खोपको पहिलो पटक मान्छेमा परीक्षण हुन लागेको हो । सोमबार ४५ जना वयस्क अमेरिकी स्वयंसेवीहरूलाई यो खोप दिएर परीक्षण गरिने छ । संक्रमित नभएका ती स्वयंसेवीहरूले खोपका विभिन्न मात्रा लिने अमेरिकी स्वास्थ्य अधिकारीहरुले जनाएका छन् ।

अमेरिकाको नेशनल इन्स्टिच्युट अफ हेल्थले परीक्षणको व्यवस्था मिलाएको खोपको नाम एम.आर.एन.ए–१२७३ राखिएको समाचार संस्था एपीले उल्लेख गरेको छ ।

पहिलो चरणमा कोरोना भाइरसविरुद्धको भ्याक्सिनको मात्राले प्रतिरक्षा प्रणालीले कुनै प्रतिक्रिया जनाए वा नजनाएको जाँच हुनेछ ।

खोपको ‘साइड इफेक्ट’ कस्तो हुन्छ भन्ने हेर्नका लागि प्रारम्भिक परीक्षण गर्न लागिएको र यसले बिस्तारित स्तरमा परीक्षणका लागि मार्ग प्रशस्त गर्ने जनाइएको छ । खोपमा कोरोना भाइरसको कुनै पनि अंश नरहेको जनाइएको छ ।