सरकारले कोरोना भाइरस (कोभिड–१९) सम्बन्धी जिज्ञासा तथा गुनासा सम्बोधनको लागि जारी गरेको १११५ नम्बरको कल सेन्टरमा दैनिक एक हजारभन्दा बढी फोन आउने गरेको छ ।
सञ्चालनमा आएको तीन दिनमै ५ हजारभन्दा बढी फोन आएको इपिडिमियोलोजी तथा रोग नियन्त्रण महाशाखाका निर्देशक वासुदेव पाण्डेले बताए । कल सेन्टरमा अहिले ६ जना कर्मचारी कार्यरत छन् । फोनको चाप बढी भएपछि कर्मचारी थप्नुपर्ने देखिएको उनले बताए ।
सम्भावित संक्रमणबाट कसरी बच्न सकिन्छ, कोरोनाका लक्षण कस्ता हुन्छन्, सरकारले कोरोना नियन्त्रणको लागि कस्ता योजना ल्याएको छ भन्नेजस्ता जिज्ञासा कल सेन्टरमा सोधिने गरेका छन्।
धेरैजसो फोन सुदूरपश्चिमका जिल्लाबाट आउने र उनीहरुले नेपाल–भारत–चीन सीमा नाका खुल्ला छ कि बन्द छ भन्ने जानकारी लिने बताइएको छ ।
सरकारले कोरोना सम्बन्धी गुनासा सम्बोधन गर्न गएको शुक्रबारदेखि १११५ नम्बरको कल सेन्टरको स्थापना गरेको हो। यो नम्बरमा फोन गर्न पैसा लाग्दैन।