शनिबार, जेठ १७, २०७७

समाचार

प्रदेश १ मा ११, ६५३ को कोरोना जाँच, १८ संक्रमित सबैको अवस्था सामान्य

1588926628Koshi_Hospial.jpg

प्रदेश १ मा ११ हजार ६ सय ५३ जनाको कोभिड–१९ को जाँच भएको छ । मेसिनबाट स्वाब लिएर गरिने पिसिआर जाँचबाट २ हजार ९ सय १९ जनाको परीक्षण भएको छ भने कोभिड–१९ टेस्ट किटबाट गरिने द्रुत परीक्षण ८ हजार ९ सय ३३ जनाको भएको छ ।

पिसिआर टेस्ट धरानमा एक तथा विराटनगरमा दुई स्थानमा हुँदै आएको छ भने प्रदेश १ का १४ जिल्लाका १३७ स्थानीय निकाय सबैमा द्रुत परीक्षण भएको प्रदेश सरकार मुख्यमन्त्री कार्यालय मातहतमा राखेको कोरोना सूचना डेस्कले जानकारी दिएको छ ।

प्रदेश १ मा ३५ जनाको कोरोना पुष्टि भएको थियो । १७ जना उपचारपछि घर फर्केका छन् भने १८ जनाको उपचार भइरहेको छ । प्रदेश १ सरकारले गत चैत्र २१ गते नेसनल साल्ट ट्रेडिङको विराटनगर १० मा बनाएको कोभिड–१९ अस्पतालमा उपचाररत सबैको अवस्था सामान्य रहेको उपचारमा संलग्न डाक्टर दीपक सिग्देलले बताए।

सिग्देलका अनुसार ५ भेन्टिलेटर र ५० बेड क्षमताको अस्पतालमा अहिलेसम्म कुनैपनि बिरामीहरु भेन्टिलेटरमा राख्नु परेको छैन ।

प्रदेश सरकारले गत चैतमा निर्माण गरेको कोरोना जनसुरक्षा कोषमा बिहीबारसम्म २९ करोड २६ लाख ५० हजार ८ सय ६३ रुपैयाँ जम्मा भएको छ । खर्च निकासा कट्टा गरी जम्मा बाँकी हुन आउने रकम १४ करोड १७ लाख ५० हजार ७ सय १३ रुपैयाँ रहेको कोरोना सूचना डेस्कका सदस्य तथा मुख्यमन्त्रीका प्रेस संयोजक ध्रुव सुवेदीले नेपाल समयलाई जानकारी दिए ।

प्रतिक्रिया दिनुहोस्