काठमाडौं- कोरोना भाइरसको संत्रासका कारण अमेरिकाले युरोपबाट हुने सबै हवाई उडानमा प्रतिबन्ध लगाएको छ ।
अमेरिकी राष्ट्रपति डोनाल्ड ट्रम्पले भोलि (शुक्रबार)देखि ३० दिनसम्मका लागि युरोपबाट अमेरिकामा हुने सबै उडान बन्द गर्ने घोषणा गरेका हुन् ।
युरोप–अमेरिका यात्रामा प्रतिबन्ध लगाउने घोषणा गर्दै ट्रम्पले यो कडा र अत्यावश्यक प्रतिबन्ध बेलायतमा भने लागु नहुने पनि स्पष्ट पारेका छन् ।
ट्रम्पले कोरोना भाइरस विश्वभरको दुस्मन भएको भन्दै यसलाई चाँडो नियन्त्रण गर्नुपर्नेमा जोड दिएका छन् । नयाँ सङ्क्रमण रोक्नकै लागि युरोपसँगको यात्रामा प्रतिबन्ध लगाउनु परेको उनको भनाइ छ ।
युरोपको इटली, फ्रान्स, स्पेन, जर्मनी, स्वीजरल्याण्ड, नर्वेलगायतका देशमा कोरोनाको सङ्क्रमण तीव्र बनेको छ ।
अमेरिकामा अहिलेसम्म कोरोना भाइरसको सङ्क्रमणबाट ३८ जनाको मृत्यु भएको छ भने एक हजार तीन सय २२ जनामा संक्रमित भएका छन् ।