काठमाडौं- दोस्रो पटक मिर्गाैला प्रत्यारोपण गराएका प्रधानमन्त्री केपी शर्मा ओलीको पिसाबमा संक्रमण भएको आशंका गरिएको छ। उपचारमा संलग्न चिकित्सकको टोलीले ‘क्लेबसेला ब्याक्टेरिया’ को संक्रमण भएको शंका लागेसँगै पिसाबको कल्चर गर्न पठाइएको छ ।
प्रधानमन्त्रीका निजी चिकित्सक डा. दिव्यासिंह शाहले ओलीलाई हाल संक्रमण हुने जोखिम उच्च रहेको स्वीकार गर्दै पिसाब कल्चर गर्न पठाइएको जानकारी दिइन् । उनका अनुसार यसको रिपोर्ट आउन ४८ घण्टा लाग्नेछ ।
मंगलबार परिक्षणका लागि पठाइएको र बिहीबारमात्रै रिपोर्ट आउने भएकाले बाँकी निर्णय रिपोर्टका आधारमा गरिने पनि उनले जानकारी दिइन् । उनका अनुसार प्रधानमन्त्री ओलीलाई डिस्चार्ज गर्ने निर्णय पनि यही रिपोर्टमा भर पर्नेछ ।
यदि संक्रमण पुष्टि भए अझै केही दिन अस्पताल नै राख्नुपर्ने चिकित्सकहरुले बताएका छन् । संक्रमण नदेखिए एक दुई दिनपछि नै डिस्चार्ज गर्ने उनीहरुको तयारी छ ।
चिकित्सकका अनुसार प्रधानमन्त्री ओलीलाई पहिला पनि ‘क्लेबसेला ब्याक्टेरिया’ को संक्रमण देखिएकाले अहिले शरीरको रोग प्रतिरोधात्मक क्षमता कम भएका बेला त्यो फेरि फर्किने सम्भावना प्रबल रहन्छ । उनलाई त्यसबेला ‘पिपेरासिलिन–ट्याजोब्याक्टम’ नामक एन्टिबायोटिक प्रयोग गरिएको थियो ।
सुरुमा चिकित्सकहरूले मिर्गौला प्रत्यारोपणको पाँचदेखि सात दिनभित्र डिस्चार्ज गर्ने बताए पनि ओलीलाई बुधबारसम्म ‘लिभर आईसीयू’ मै राखिएको छ ।