रौतहटबाट हतियारसहित दुईजना पक्राउ

जनकपुरधाम– प्रहरीले रौतहटबाट दुईजनालाई हतियारसहित पक्राउ गरेको छ ।

पक्राउ पर्नेहरुमा सर्लाही धनकौला गाउँपालिका–६ छोटौल बैरिया टोल बस्ने २६ वर्षीय राजेश राम र सोही ठाउँ बस्ने २१ वर्षीय जयनारायण राम रहेको प्रहरीले जनाएको छ ।

रौतहटको गरुडा प्रहरी कार्यालयबाट खटेको टोलीले दुबैजनालाई गढीमाई नगरपालिका–६ धरमपुरस्थित बागमती पुल नजिकबाट पक्राउ गरेको हो । प्रहरीले उनीहरुलाई सोमबार राति पक्राउ गरेको जनाइएको छ ।

बीआर ३० यू ८३८२ नम्बरको मोटरसाइकल चढेर हतियारसहित दुईजना मानिसहरु आइरहेको विशेष सूचनाको आधारमा गरुडा प्रहरी कार्यालयका इन्चार्ज डीएसपी ज्ञानकुमार महतो नेतृत्वको टोली घेरा हालेर बसेको थियो ।

सडकबाट आवतजावत गर्ने मोटरसाइकलहरुलाई चेकजाँच गर्ने क्रममा उनीहरु हतियारसहित पक्राउ परेको गरुडा प्रहरी कार्यालयका इन्चार्ज महतोले जानकारी दिए ।

चेकजाँचको क्रममा राजेशको साथबाट एकथान कटुवा पेस्तोल र त्यसमा प्रयोग हुने दुई राउण्ड गोली तथा जयनारायणको साथबाट एक राउण्ड गोली बरामद भएको डीएसपी महतोले बताए ।

पक्राउ परेका दुबैजनालाई गरुडा प्रहरी कार्यालयको हिरासतमा राखेर थप अनुसन्धान भइरहेको प्रहरीले जनाएको छ ।