बैतडीमा चितुवाको आक्रमणबाट बालिकाको मृत्यु

धनगढी– बैतडीमा चितुवाको आक्रमणबाट बालिकाको ज्यान गएको छ। तल्लो सोराड क्षेत्रको मेलौली नगरपालिका–९, असुरका रामबहादुर लुहारकी ८ वर्षीया छोरी सीताको चितुवाको आक्रमणबाट ज्यान गएको हो।

बालिकालाई मंगलबार बिहान ४ बजे ओछ्यानमा सुतेकै अवस्थामा चितुवाले आक्रमण गरेको थियो। घरदेखि करिब पाँच सय मिटर पर शव फेला परेको जिल्ला प्रहरी कार्यालय, बैतडीका प्रमुख डिएसपी डिल्लीनारायाण पाण्डेयले जानकारी दिए।

गत साता चितुवाको आक्रमणबाट बालक घाइते भएका थिए । तल्लो सोराड क्षेत्रमा २०६४ सालयता चितुवाको आक्रमणबाट २५ जानाको ज्यान गइसकेको प्रहरीले जनाएको छ।