आज अन्तर्राष्ट्रिय नारी दिवस

काठमाडौं– आज मार्च ८ अर्थात् अन्तर्राष्ट्रिय नारी दिवस। नेपाललगायत विश्वभर विविध कार्यक्रम गरी यो दिवस मनाइँदैछ। 

यस वर्ष ‘समानताको पुस्ताः अन्त्य गरौं हिंसा, विभेद र असमानता’ भन्ने नारा तय गरिएको छ। नारी दिवसकै अवसरमा नेपालमा पनि विविध कार्यक्रम आयोजना गरिने भएका छन्।

नारी दिवसकै अवसरमा राष्ट्रपति, उपराष्ट्रपतिलगायतले शुभकामना दिएका छन्।

राष्ट्रपति विद्यादेवी भण्डारीले संविधानमा नै महिला हकहितको सुनिश्चितता गरिएको र अबका दिनमा आवधिक योजना तथा कार्यक्रममा समेत महिला सशक्तीकरण एवं लैगिंक समानताका लागि प्राथमिकताका साथ लाग्न आग्रह गरेकी छन्।

उपराष्ट्रपति नन्दबहादुर पुनले सबै नेपाली महिलामा आपसी सद्भाव, सहिष्णुता र भाइचाराको अभिवृद्धि गर्दै संविधान कार्यान्वयन लगायत राष्ट्रका कार्यभारहरु पूरा गर्न उत्साह, जोस, जाँगर तथा शक्ति थपियोस् भन्ने कामना गरेका छन्।

यस्तै, नेपाली कांग्रेसका सभापति शेरबहादुर देउवाले अहिले पनि महिलामाथि हुने विभेद र हिंसाका घटनाबाट मुक्त हुन नसकेको, गाउँशहरमा आज पनि महिलाहरु शोषण, दमन र उत्पीडनबाट आक्रान्त रहेका, महिलामाथि हुने विभेद र हिंसाकाविरुद्ध नारी जागरण आजको आवश्यकता भएको बताएका छन्।