जनकपुरधाम– प्रदेश २ सरकारले प्रदेश प्रहरीलाई मोटरसाइकल सहयोग गरेको छ। प्रदेशभित्र शान्ति सुरक्षा मजबुत बनाउने कार्यमा सहयोग पुर्याउने उद्देश्यले प्रदेश सरकारले प्रदेश प्रहरीलाई २४ थान मोटरसाइकल हस्तान्तरण गरेको हो।
शुक्रबार एक कार्यक्रमबीच प्रदेश सरकारका आन्तरिक मामिला तथा कानुनमन्त्री ज्ञानेन्द्रकुमार यादवले प्रदेश प्रहरी प्रमुख डीआईजी प्रद्युम्न कार्कीलाई मोटरसाइकल हस्तान्तण गरेका छन्।
मोटरसाइकल हस्तान्तरण गर्दै आन्तरिक मामिला तथा कानुनमन्त्री यादवले साधनस्रोतको अभावमा पनि नेपाल प्रहरीले शान्ति सुरक्षा कायम गर्न प्रशंसनीय काम गरिरहेको बताए। प्रहरीलाई साधनस्रोत सम्पन्न बनाउन प्रदेश प्रहरी कटिबद्ध रहेको र यसतर्फ कुनै कसर बाँकी नराखिने यादवको भनाइ थियो।
प्रदेश प्रहरी प्रमुख कार्कीले प्रदेश सरकारले हस्तान्तरण गरेको मोटरसाइकलको सदुपयोग गरि प्रदेशभित्र शान्ति सुरक्षा कायम गर्न हरसमय तत्पर रहेको बताए। सीमित साधन स्रोतका बाबजुद प्रहरीले आफ्नो तर्फबाट अधिकतम प्रयास गरिरहेको उनले बताए।