तिलोत्तमामा महिला मृत फेला, पतिको संलग्नता दाबी गर्दै छानबिन माग

बुटवल– रुपन्देहीको तिलोत्तमामा एक महिला मृत फेला परेपछि हत्याको दाबीसहित छानबिन गर्न माइती पक्षले माग गरेका छन्। 

तिलोत्तमा नगरपालिका वडा नंं ५ की २७ वर्षिया सीता भण्डारी पौडेलको भदौ १९ गते राति शव भेटिएको थियो। मंगलबार बुटवलमा पत्रकार सम्मेलन गर्दै मृतकको माइती पक्षले घरको परिवारको योजनामा आफ्नो छोरीको हत्या भएको भन्दै छानविन गर्न माग गरेका हुन्। श्रीमान् टीका पौडेलले हत्या गरी झुन्ड्याएको वहाना गरेको माइती पक्षको आरोप छ । 

शवको प्रकृति र घटनाक्रम हेर्दा आत्महत्या हुनै नसक्ने मृतकका बुबा हरिप्रसाद भण्डारीले बताए। अनुहारमा रगत लतपतिएको दृश्यले हत्या नै भएको उनको भनाइ छ। घटनाबारेमा इलाका प्रहरी कार्यालय बुटवलमा किटानी जाहेरी दिए पनि प्रहरीले जाहेरी दर्ता नगरेको भण्डारीले बताए। 

मृतकका श्रीमानले तानसेनमा दरबार रिसोर्ट सञ्चालन गर्दै आएका छन्। मृतकका देवर हरि पौडेल तिलोत्तमा नगरपालिका वडा नंं. ५ का वडा सदस्य हुन्। इलाका प्रहरी कार्यालय बुटवलका प्रमुख नायब उपरीक्षक मदन कुँवरले पोष्टमार्टम रिपोर्टमा आत्महत्या गरेको देखिएकाले किटानी जोहरी लिन नसकिने बताए। घटनाक्रमलाई नियाल्दा श्रीमानको व्यवहारले आत्महत्या गर्न बाध्य पारेको हुनसक्ने भन्दै अनुसन्धान त्यहि अनुसार गरिएको उनले बताए।