सुर्खेत । विश्वका धेरै देशमा महामारीको रुपमा फैलिएको कोरोना भाइरस (कोभिड–१९) भित्रन नदिन कर्णालीमा विशेष तयारी थालिएको छ । कोरोनाबाट जोगिन कर्णाली भित्रिने मुख्य नाका र विमानस्थलमा हेल्प डेस्क स्थापना गरिएको छ ।
बिहीबारदेखि सुर्खेत विमानस्थलमा हेल्प डेस्क राखिएको छ । काठमाडौंबाट भित्रने यात्रुको स्वास्थ्य चेकजाँच गर्ने उद्देश्यले विमानस्थलमा डेस्क राखिएको हो ।
कोरोनाबाट अति प्रभावित छिमेकी देश चीनसँग सीमा जोडिएको हुम्लासहित चार वटा नाकामा पनि हेल्थडेस्क स्थापना गर्न लागिएको छ । तिब्बतसँग सीमाना जोडिएको हुम्लाको हिल्सा, ५ नम्बर प्रदेशसँग जोडिएको बबई र तीन नाकामा स्थानमा चेकजाँच गरिनेछ । यसका लागि यी स्थानमा हेल्थ डेस्क राख्ने तयारी प्रदेश सरकारले गरेको छ ।
यी नाकामा औषधीसहित खटिने टोलीले आवतजावत गर्ने नागरिकहरुलाई सचेतनामूलक कार्यक्रम सञ्चालन गर्ने र शंकास्पद विरामीलाई स्वास्थ्य चेकजाँच पनि गर्नेछन् । हेल्थ डेस्कमा आवश्यक सामग्री तथा औषधिहरु तत्काल हिल्सा नाकामा पठाउने तयारी अवस्थामा राखिएको प्रदेश स्वास्थ्य सेवा निर्देशनालयका निर्देशक रीता भण्डारी जोशीले जानकारी दिइन् ।
यस्तै प्रदेश अस्पताल सुर्खेतमा पनि कोरोना भाइरसबाट संक्रमितलाई उपचार गर्न दुई बेडसहितको विशेष कक्ष स्थापना गरिएको छ । एक साताअघि कर्णाली प्रदेशको सामाजिक विकास मन्त्रालयले विशेष वैठकबाट प्रदेशमा कोभिड–१९ भित्रिन नदिन तयारी थाल्ने निर्णय गरेको थियो ।