काठमाडौं– दातृ निकायहरूले नेपाललाई दिँदै आएको अनुदान रकम घटाउन थालेका छन् भने ऋण बढाउन थालेका छन्।
अर्थ मन्त्रालयको ‘विकास सहायता रिपोर्ट–२०१९’ अनुसार नेपालले गत आर्थिक वर्षमा दातृ राष्ट्रबाट ६० प्रतिशत ऋण, २७ प्रतिशत अनुदान र १३ प्रतिशत प्राविधिक सहयोग पाएको छ।
रिपोर्टअनुसार दुई वर्षदेखि विश्व बैंक, एसियाली विकास बैंकलगायतका मुख्य दाताले ऋणको अनुपात बढाउँदै लगेका छन्। विश्व बैंक र एसियाली विकास बैंकपछि चीन सर्वाधिक सहायता रकम उपलब्ध गराउने मुलुक हो।
यस्तै बेलायत, संयुक्त राष्ट्रसंघ कन्ट्री टिम, जापान र युरोपियन युनियन सर्वाधिक अनुदान दिने दाता हुन्। जर्मनी, अमेरिकालगायतका मुलुक प्राविधिक सहयोग दिनेमा अगाडि छन्।
गत आवमा विश्व बैंकले कुल ५२ करोड ८० लाख अमेरिकी डलर रकम उपलब्ध गराएको थियो। जुन कुल सहयोग रकमको ३३ प्रतिशत हो।
एसियाली विकास बैंकले २९ करोड ३० लाख अमेरिकी डलर अर्थात् १९ प्रतिशत सहयोग उपलब्ध गराएको छ। विश्व बैंकबाट प्राप्त सहयोगको ९५ प्रतिशत ऋण हो भने एसियाली विकास बैंकबाट प्राप्त सहयोगको ८९ प्रतिशत ऋण हो।
छिमेकी चीनले १५ करोड अमेरिकी डलर उपलब्ध गराएको छ। जुन कुल वैदेशिक सहयोगको १० प्रतिशत हो। चीनले उपलब्ध गराएको रकममध्ये ७० प्रतिशत अनुदान र ३० प्रतिशत प्राविधिक सहायता हो।
दातृ राष्ट्र र निकायले ऋण सहायता बढाएसँगै मुलुकको ऋणभार पनि बढेको छ।