बल्लबल्ल भएको सहमति तोडिएको पौडेल समूहको निष्कर्ष, उपसभापतिको भेला बहिस्कार

काठमाडौं– नेपाली कांग्रेसका वरिष्ठ नेता रामचन्द्र पौडले समूहले पार्टीले आयोजना गरेको जिल्ला उपसभापतिहरुको भेला बहिस्कार गर्ने भएको छ।

पार्टीको प्रशिक्षण प्रतिष्ठानले बुधबार आयोजना गरेको एक दिने जिल्ला सभापतिहरुको भेला बहिस्कार गर्ने निर्णय भएको नेता प्रकाशमान सिंहले जनाएका छन्।

पार्टी सभापति शेरबहादुर देउवाले १४ औं महाधिवेशनलाई प्रभावित गर्ने गरी कार्यक्रमहरु गरिरहेकोले भेला बहिस्कार गर्ने निर्णय भएको सिंहले बताए।

बुधबार बिहान नेता सिंहको चाक्सीवारीस्थित निवासमा पौडेल समूहका नेता तथा केन्द्रीय सदस्यहरु र काठमाडौंमा उपलब्ध जिल्ला सभापतिहरुको भेला भएको थियो।

उक्त भेलामा वरिष्ठ नेता पौडेले र महामन्त्री शंशाक कोइरालाले जिल्लाका उपसभापतिहरुलाई भेलामा सहभागी नहुन आग्रह गरेका छन्।

पार्टी महाधिवेशन केन्द्रीत हुनुपर्नेमा सभापति देउवाले एकलौटी गर्न थालेको भन्दै उनीहरुले असन्तुष्टि व्यक्त गरेका हुन्।

बैठकपछि नेता सिंहले भने,‘निर्वाचन आचार संहिता र १४ औं महाधिवेशनलाई प्रभावित गर्ने विभाग पदाधिकारी नियुक्त भएको छ। बल्लबल्ल भएको सहमति तोड्ने प्रयास भएको छ। पार्टी महाधिवेशनमा केन्द्रीत हुनुपर्छ। थपिएको समयमा धाँधलीरहित तबरले महाधिवेशन सम्पन्न हुनु पर्छ। केन्द्रीय महाधिवेशनलाई प्रभावित गर्ने खालको कार्यक्रम भएकाले आजको कार्यक्रम बहिस्कार गर्ने निष्कर्ष निकालिएको छ।’