आइतबार, जेठ १८, २०७७

समाचार

वडाको समन्वयमा दैनिक ५ सय विपन्नलाई खाना

1588665424bhat_.jpg

काठमाडौं- मजदुर, गरिब, विपन्नहरुलाई लक्षित गरेर गोणर्केश्वर नगरपालिका वडा नम्बर ९ ले बिहान बेलुका निःशुल्क खानाको व्यवस्था गरेको छ।

वडाले गत ११ गतेदेखि आरुबारी चोकको अरुणोदय स्कुलमा खाना खुवाउन थालेको हो। ‘हामीले बिहान र बेलुका खाना खुवाउन थालेको १२ दिन भयो,’ वडा अध्यक्ष राजीव थापाले नेपाल समयलाई भने, ‘एक पटकमा झन्डै पाँच सयभन्दा बढीलाई खुवाउने गरेका छौं।’

एक पटकमा सय किलो चामल पकाउने गरेको उनले बताए । ‘आरुबारी क्षेत्रमा बसोबास गरिरहेका दैनिक ज्यालादारी र अन्य काम गर्ने मजदुर साथीहरुलाई सहयोगस्वरुप खाना खुवाउन थालिएको हो,’ थापाले भने, ‘यसमा वडाको भूमिका समन्वयकारी छ ।’

उनले विभिन्न दाताले खाना खुवाउन सहयोग गरिरहेको बताए। एक पटक सय किलो चामल र दाल तरकारी पकाउन झन्डै २० हजार खर्च लाग्छ। ‘कतिपय दाताहरुले एक छाक बापतको सम्पूर्ण नगद सहयोग गर्नुभएको छ भने कतिपयले चालम दिने, खाद्यान्न तथा तरकारी दिने गर्नुभएको छ,’ थापाले भने, ‘राहत दिनुभन्दा खाना खुवाउनु प्रभावकारी भएको अनुभव भएको छ।’

खाना खुवाउनका लागि चामल ओसारिरहेका थिए, लीलाबहादुर खड्का। रामेछाप स्थायी घर भई पन्ध्रसोह्र वर्षदेखि आरुबारीमा बसोबास गरिरहेका खड्का खाद्यान्न पसल चलाउँछन्। ‘म यहाँ बसेको यतिका वर्ष भयो। यहीँ कमाएँ। संकटमा समुदायमा सहयोग गर्नु कर्तव्य हो।’

सहयोग गर्न आउनेमा कतार एयरमा कार्यरत दीपक गुरुङ पनि थिए। उनले एक छाकबापतको वीस हजार नगद सहयोग गरे। उनी सहयोग गर्नकै लागि धोबीघाटबाट आरुबारी आइपुगेका थिए। ‘साथीभाइले यहाँ खाना खुवाइरहेको समाचार सुनाए,’ गुरुङले भने, ‘आफूले सकेको सहयोग गर्न आएको हुँ।’

खाना खुवाउने काममा व्यस्त थिएवसन्तकुमार पण्डित। स्थानीय बासिन्दा पण्डित सुरुदेखि नै स्वम्सेवकका रुपमा खटिइरहेका छन् । ‘खाना वितरण गर्ने काम पनि चुनौतीपूर्ण छ। एकै पटक चाप हुने हुँदा त्यो व्यवस्थापन गर्न पनि धेरै स्वम्सेवी खट्नुपर्ने हुन्छ,’ पण्डितले भने।

समुदायले एक आसपमा सहयोग गर्नु हालको अवस्थामा ठूलो हौसला र प्रेरणाको कुरा भएको स्थानीय स्वम्सेवी जीवन लामा बताउँछन्।

प्रतिक्रिया दिनुहोस्