काठमाडौं– त्रिभुवन आर्मी क्लब इलाममा जारी छैटौँ संस्करणको माईभ्याली गोल्डकपको सेमीफाइनलमा प्रवेश गरेको छ ।
ए डिभिजन लिग उपविजेता आर्मीले आइतबार संकटा क्लबलाई २–१ गोल अन्तरले पराजित गर्दै सेमीफाइनलको यात्रा तय गरेको हो ।
त्रिभुवन आर्मीका २८ नम्बर खेलाडी सुडिल राईले खेल शुरु भएको सातौँ मिनेटमा पहिलो गोल गर्दै खाता खोलेका थिए । प्रतिष्पर्धात्मक खेलको ७२ औं मिनेटमा त्रिभुवन आर्मीका राईले नै थप एक गोल गर्दै नतिजा दोब्बर बनाएका थिए ।
खेलको ४० औं मिनेटमा संकटाका २५ नम्बर खेलाडी डेडी बम्बाले एक मात्र सान्त्वना गोल गर्दै निल हुनबाट बचाएका थिए । आर्मीले अब फाइनलमा पुग्नका लागि आयोजक माईभ्याली र मोहम्मडन कोलकाताबीचको विजेतासँग २२ गते खेल्नु पर्ने हुन्छ ।