पत्रकार पौडेलको उपचारका लागि जुट्यो १४ लाख

काठमाडौं– विराटनगरवाट सञ्चालित मकालु टेलिभिजनका समाचार प्रमुख कमल पौडेलको उपचारका लागि १४ लाख रुपैयाँ जुटेको छ। पत्रकारहरुको अन्तर्राष्ट्रिय नेटवर्क (इन्जा), डिसी नेपाल डट कम र इनेप्लिज डट कमको आह्वानमा उक्त रकम संकलन भएको हो।

इन्जाले आफ्नो दोस्रो स्थापना दिवसको अवसरमा आज उक्त रकम पौडेलको परिवारलाई हस्तान्तरण गर्न लागेको इन्जा एसियाका अध्यक्ष टंक पन्तले जानकारी दिएका छन्। हाललाई सहयोग संकलन स्थगित गरिएको इन्जाले जनाएको छ।

अचानक ब्लड क्यान्सर देखिएपछि पौडेललाई काठमाडौंको मीनभवनस्थित सिभिल हस्पिटलमा भर्ना गरिएको छ।

जनआस्था साप्ताहिकबाट पत्रकारिता सुरु गरेका पौडेल नेपाल समाचारपत्र दैनिकमा जिल्ला ब्युरो प्रमुख थिए। त्यसपछि उनले विराटनगर फर्केर टेलिभिजनमा काम गर्न थालेका हुन्।